ज्वाला अपडेट
कञ्चनपुर । वेदकोट नगरपालिका कञ्चनपुरमा कोरोना संक्रमणबाट स्वास्थ्यकर्मीले ज्यान गुमाएका छन् । वेदकोटको स्वास्थ्य शाखाकी सिनियर अनमी सरस्वती कार्कीको कोरोना संक्रमणका कारण बुधवार राति ज्यान गएको हो ।
५० वर्षीय कार्कीको नेपालगञ्ज मेडिकल कलेज शिक्षण अस्पताल कोहलपुरमा ज्यान गएको हो । कोरोना संक्रमण देखिएपछि उनलाई उपचारका लागि नेपालगञ्ज लगिएको थियो ।
भीमदत्त नगरपालिका ६ की कार्की केही दिनअघि बिरामी भएपछि घर बिदामा बसेकी थिइन् । उनलाई अक्सिजनको कमी देखिएर स्वास्थ्य समस्या बढेपछि कोहलपुर लगिएको थियो ।
दोस्रो लहरको कोरोना महामारीमा जिल्लामा ज्यान गुमाउने उनी पहिलो सरकारी कर्मचारी हुन् । गत वर्ष पनि पहिलो चरणको महामारीमा पनि वेदकोटको शिक्षा शाखाका विद्यालय निरीक्षक शंकरदत्त भट्टको ज्यान गएको थियो ।
यसैबीच नेपाल निजामती कर्मचारी संगठन कञ्चनपुरका अध्यक्ष देवदत्त जोशीले अनमी कार्कीको निधनप्रति दुःख व्यक्त गरेका छन् । उनले घर परिवारमा समवेदना दिएर कार्कीको निधनले संगठनलाई अपूरणीय क्षति पुगेको बताएका छन् । उनी कर्मचारी संगठनका सदस्य प्रेमसिंह कार्कीकी पत्नी हुन् । बेदकोट नगरपालिकाले बिहीबार नगरपालिकामा कार्कीको निधनमा शोक बिदा दिएको छ ।
बिहिबार, जेठ १३, २०७८मा प्रकाशित गरिएको
१.
२.
३.
४.
५.
६.
