सुर्खेत । सुर्खेत जिल्लाको गुर्भाकोट नगरपालिकास्थित मेहेलकुना बजारमा संयुक्त बजार अनुगमन गरिएको छ। मिति २०८३ असोज १६ गते बिहान ९ बजेदेखि दिउँसो २:३० बजेसम्म सञ्चालन गरिएको अनुगमनका क्रममा म्याद गुज्रिएका २० हजार ६९० रुपैयाँ बराबरका खाद्य तथा पेय पदार्थ जफत गरी नष्ट गरिएको छ।गुर्भाकोट नगरपालिकाको आयोजनामा तथा सुर्खेतका निमित्त प्रमुख जिल्ला अधिकारीको संयोजकत्वमा भएको अनुगमनमा खाद्य प्रविधि तथा गुण नियन्त्रण कार्यालयका अधिकृत, गुर्भाकोट नगरपालिकाको उद्योग शाखाका कर्मचारी, इलाका प्रशासन कार्यालयका प्रतिनिधि, नेपाल प्रहरीको टोली तथा पत्रकारहरूको सहभागिता रहेको थियो।अनुगमनका क्रममा म्याद गुज्रिएका खाद्यान्न, जुस, हल्का पेय पदार्थ, घिउ, तेल, सुजी, मसला लगायतका सामग्री फेला परेका थिए। जफत गरिएका ती सामग्री गुर्भाकोट नगरपालिकाको खाली जग्गामा खाल्डो खनी नष्ट गरिएको जनाइएको छ।उपभोक्ताको स्वास्थ्यमा पर्न सक्ने सम्भावित जोखिम न्यूनीकरण तथा बजारमा गुणस्तरीय वस्तुको बिक्री–वितरण सुनिश्चित गर्ने उद्देश्यले गरिएको संयुक्त अनुगमनले व्यवसायीलाई म्याद नाघेका सामग्री बिक्री–वितरण नगर्न र उपभोक्ताको स्वास्थ्यप्रति जिम्मेवार बन्न सचेत गराएको छ।

शुक्रबार, आश्विन १६, २०८३मा प्रकाशित गरिएको