ज्वाला अपडेट
सुर्खेत । प्रधानमन्त्री कप पुरुष राष्ट्रिय क्रिकेट प्रतियोगिता आगामी चैत ७ गतेदेखि सुरु हुँदैछ । देशकै प्रतिष्ठित यस प्रतियोगितामा सातै प्रदेश र तीन विभागीय टोलीको सहभागिता रहनेछ भने खेलहरू काठमाडौं, जनकपुर र पर्सामा सञ्चालन हुनेछन् ।
यही प्रतियोगितामा सहभागिता जनाउने कर्णाली प्रदेशको टोलीलाई आज औपचारिक रूपमा विदाइ गरिएको छ । कर्णाली प्रदेश क्रिकेट संघद्वारा आयोजित विदाइ कार्यक्रममा खेलाडीहरूलाई सफलताको शुभकामना दिँदै उच्च मनोबलका साथ मैदानमा उत्रिन आग्रह गरिएको छ ।
कार्यक्रममा संघका केन्द्रीय सदस्य तथा कर्णाली प्रदेश क्रिकेट संघका सचिव श्रीधर केसीले कर्णालीको नाम जितसँग जोड्न खेलाडीहरूलाई सुझाव दिँदै उत्कृष्ट प्रदर्शन गर्न प्रेरित गरे । अनुशासन, आत्मविश्वास र टिमवर्क नै जितको आधार हुने उनले उल्लेख गरे ।
यस्तै, प्रतियोगितामा सहभागी खेलाडीहरूले कर्णालीको नाम स्वर्ण अक्षरमा लेखाउने प्रतिबद्धता व्यक्त गरेका छन् । टोलीका कप्तान दिवान पुनले यसपटक कर्णालीले राष्ट्रिय प्रतियोगितामा सम्मानजनक स्थान हासिल गर्ने विश्वास व्यक्त गरे ।
प्रतियोगिता नजिकिँदै गर्दा कर्णाली टोली उत्साह र आत्मविश्वासका साथ तयारीमा जुटेको छ। अब मैदानमा देखिने प्रदर्शनले नै उनीहरूको लक्ष्य कत्तिको सफल हुन्छ भन्ने तय गर्नेछ ।
बिहिबार, चैत्र ०५, २०८२मा प्रकाशित गरिएको
१.
२.
३.
४.
५.
६.
