ज्वाला अपडेट
काठमाडौं । विश्व स्वास्थ्य संगठन (डब्ल्यूएचओ) ले प्रयोग नगर्न सुझाएको रेमडिसिभिरले नेपालमा भने राम्रै नतिजा दिएको चिकित्सकहरुले बताएका छन् ।
अमेरिकी फुड एण्ड ड्रग एडमिनिस्ट्रेसन (एफडीए)ले अपतकालीन प्रयोगका लागि अनुमति दिएको रेमडिसिभिर नेपालमा क्लिनिकल ट्रायलका रुपमा प्रयोग भइरहेको छ । राष्ट्रिय स्वास्थ्य अनुसन्धान परिषद (एनएचआरसी)सँग समन्वय गरेर अस्पतालहरुले गम्भीर अवस्थाका कोरोना संक्रमितलाई यो औषधि प्रयोग गर्दै आएका थिए ।
तर हालैमात्र डब्ल्यूएचओ रेमडिसिभिरको ठूलो साइड इफेक्ट नदेखिएपनि गम्भीर प्रकृतिका संक्रमितको स्वास्थ्यमा सुधार आएको कुनै प्रमाण नरहेको स्पष्ट पारेको छ ।
रेमडिसिभिर प्रयोग गरिरहेका शुक्रराज ट्रपिकल तथा सरुवा रोग अस्पताल, त्रिवि शिक्षण अस्पतालका साथै निजी अस्पतालका चिकित्सकहरु पनि राम्रै नतिजा दिइरहेका बताउँछन् ।
तर डब्ल्यूएचओको सिफारिसपछि यसलाई प्रयोग गर्ने नगर्ने भन्ने विषयमा विज्ञ कमिटीमा छलफल गरेर निष्कर्ष निकाल्ने एनएचआरसीका प्रमुख डा. प्रदीप ज्ञवाली बताउँछन् ।
इबोलाका बिरामीमा पनि प्रयोग गरिएको रेमडिसिभिर ट्रायलको नतिजा अमेरिकामा पनि राम्रो देखिएको भन्दै एफडीएले आपतकालीन प्रयोगका लागि स्वीकृति दिएको थियो ।
नेसनल इन्स्टिच्युट अफ एलर्जी एण्ड इन्फेक्सियस डिजिज (एनआईएआईडी) का अनुसार अमेरिकाका अस्पतालमा भर्ना भएका एक हजार ६३ कोरोना संक्रमितमा गरेको अध्ययनमा अरु औषधिभन्दा यो एन्टिभाइरल प्रयोग गरेकाहरूमा प्रभावकारिता राम्रो भएको र चाँडो निको भएको छ । यो परीक्षणलाई एडप्टेड कोभिड १९ ट्रिटमेन्ट ट्रायल’ (एसीटीटी) नाम दिइएको थियो ।
आइतबार, मंसिर ०७, २०७७मा प्रकाशित गरिएको
१.
२.
३.
४.
५.
६.
