मुगु छायानाँथ रारा नगरपालिका-७ टोप्ला स्थित ताल्चा रारा कच्ची सडक खण्डमा सुर्खेतबाट रारातर्फ जाँदै गरेको हाईलक्स जिप दुर्घटना हुँदा ३ जना मृत्यु भएको छ भने २ जना घाइते भएका छन् ।
मिति २०८३।०७।२९ गते रारा कच्ची सडक खण्डमा बा १७ च १८६४ नम्बरको हाईलक्स गाडी अचानक सडकबाट अन्दाजी ६०० मिटर तल खस्दा दुर्घटना भएको हो । उक्त जिप ललितपुर महानगरपालिका–१५ बस्ने ५८ वर्षीय कञ्चन थापाले चलाएका थिए ।
दुर्घटनाको खबर प्राप्त हुनासाथ जिल्ला प्रहरी कार्यालय मुगुबाट प्रहरी नायव उपरीक्षक रविराज थपलियाको कमान्डमा १० जना र बी.सु. गार्ड ताल्चाबाट प्रहरी नायव निरीक्षक डम्बरबहादुर अधिकारीको कमान्डमा ७ जना गरी १७ जनाको प्रहरी टोली खटिएको थियो । प्रहरी टोलीले घटनास्थलबाट घाइतेहरूको उद्धार गरी उपचारका लागि जिल्ला अस्पताल मुगु पठाएको थियो ।
मृतकहरुको विवरण:
१. जिल्ला काठमाडौं, कलंकी बस्ने ५० वर्षीय विजय बस्नेत
२. जिल्ला काठमाडौं बस्ने ५४ वर्षीय रमेश बिडारी
३. जिल्ला काठमाडौं बस्ने ५० वर्षीय पूर्णकुमार थापा
घाइते तिनै जनालाई जिल्ला अस्पताल मुगु पुर्‍याउनासाथ चिकित्सकले मृत घोषणा गरेका हुन् । घाइते हरुको तत्काल सोहि अस्पतालमा उपचार भइरहेको छ ।
घाइतेहरूको विवरण :
१. जिल्ला ललितपुर, ललितपुर महानगरपालिका–१५ बस्ने ५४ वर्षीया अन्जु थापा — अवस्था मध्यम ।
२. चालक जिल्ला ललितपुर, ललितपुर महानगरपालिका–१५ बस्ने ५८ वर्षीय कञ्चन थापा — अवस्था मध्यम ।
उक्त गाडीमा चालकसहित ५ जना सवार रहेको बुझिएको छ । दुर्घटनाको कारण खुल्न बाँकी रहेको छ । साथै चालकले मादक पदार्थ सेवन गरे/नगरेको र दुर्घटनासम्बन्धी अन्य विवरण खुल्न बाँकी रहेको छ ।

आइतबार, कार्तिक ३०, २०८३मा प्रकाशित गरिएको