ज्वाला अपडेट
दैलेख । दैलेखको डुङ्गेश्वर गाउँपालिकामा बलेरो पिकअप गाडीको ठक्करबाट एक पैदलयात्री गम्भीर घाइते भएका छन् ।
शुक्रबार साँझ करिब ५ः२० बजे डुङ्गेश्वर गाउँपालिका–१ चुप्रादेखि देउली बजारतर्फ जाँदै गरेको कर्णाली प्रदेश ०२–००१ च १८२६ नम्बरको बलेरो पिकअपले समला टोल नजिकै पैदल हिँडिरहेका २९ वर्षीय जुठे विकलाई ठक्कर दिएको हो ।
जिल्ला प्रहरी कार्यालय दैलेखका अनुसार बर्दियाको बाँसगढी नगरपालिका–१ निवासी २३ वर्षीय प्रतुस कँवरले चलाएको उक्त गाडीको ठक्करबाट विकको टाउकोसहित शरीरका विभिन्न भागमा चोट लागेको छ । उनको अवस्था गम्भीर रहेको प्रहरीले जनाएको छ ।
घाइते विकलाई प्रहरीको गाडीमार्फत उपचारका लागि जिल्ला अस्पताल दैलेख पठाइएको थियो ।
घटनापछि प्रहरी चौकी चुप्रा, प्रहरी चौकी माथिल्लो डुङ्गेश्वर र जिल्ला प्रहरी कार्यालय दैलेखबाट प्रहरी टोली घटनास्थल पुगेको थियो । सशस्त्र प्रहरी बल नेपाल गुल्म हेडक्वाटर दैलेखबाट समेत टोली खटिएको थियो ।
दुर्घटनामा संलग्न बलेरो पिकअप घटनास्थलमै रहेको र चालकलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।
शुक्रबार, कार्तिक १४, २०८३मा प्रकाशित गरिएको
१.
२.
३.
४.
५.
६.
