ज्वाला अपडेट
कालिकोट । कालिकोट जिल्लाको तिलागुफा नगरपालिका वडा नम्बर ८ मा नि: शुल्क स्वास्थ्य शिविर सम्पन्न भएको छ । पशुपति शिक्षा मन्दिर नेपालगञ्जका प्राचार्य रतनबहादुर शाहीको विशेष पहल र तिलागुका ८ का वडा अध्यक्ष तिलक न्यौपानेको सहयोगमा विभिन्न स्वास्थ्य समस्यालाई मध्यनजर गर्दै हिन्दू स्वयंसेवक संघ नेपाल, कर्णाली प्रदेशले स्वास्थ्य शिविर सम्पन्न गरेको हो ।
पछिल्लो समय यस क्षेत्रका बासिन्दाहरूमा भाइरल ज्वरो, रुघाखोकी, जिउ दुख्ने, टाउको दुख्ने तथा पखाला लाग्ने र पेट दुख्ने जस्ता समस्याहरू व्यापक रूपमा देखिएपछि संघले स्थानीयलाई राहत पुर्याउने उद्देश्यले यो विशेष पहल गरेको हो ।
शिविरमा वरिष्ठ चिकित्सक डा. राम गोपाल तिवारीले उपचार गरेका थिए भने बिरामीहरूको स्वास्थ्य परीक्षण पश्चात आवश्यक स्वास्थ्य परामर्श दिए ।
साथै, रोगको प्रकृति अनुसार आवश्यक पर्ने औषधिहरू समेत पूर्ण रूपमा नि: शुल्क वितरण गरिएको छ । मौसमी संक्रमणका कारण धेरै स्थानीयहरू समस्यामा परेको अवस्थामा घरदैलो मै पुगेर दिइएको यो सेवाले समुदायमा ठूलो सहयोग पुगेको छ । शिविरमा तिलागुफा नगरपालिका वडा नम्बर ८ अन्तर्गतका विभिन्न बस्तीहरूबाट स्थानीयको बाक्लो उपस्थिति रहेको थियो ।
विशेषगरी चाखाचौर, गुरुबाडा, चौखा बाडा, सत्य बाडा र ओखरभिट्टा लगायतका गाउँहरूका लगभग ४५० जना व्यक्तिहरूले यस स्वास्थ्य सेवाको प्रत्यक्ष लाभ उठाएका छन् ।
स्वास्थ्य सेवाको सहज पहुँच नभएका यी दुर्गम गाउँहरूमा संघले पुर्याएको यो मानवीय सहयोग र डाक्टर तिवारीको सक्रियतालाई स्थानीय बासिन्दाले धन्यबाद ज्ञापन गरेका छन् ।
आइतबार, चैत्र १५, २०८२मा प्रकाशित गरिएको
१.
२.
३.
४.
५.
६.
