सुर्खेत । सुर्खेतको पञ्चपुरी नगरपालिका–४ बराइचे घर भएका ६८ वर्षीय रोजबहादुर शाहीको बस यात्राका क्रममा मृत्यु भएको छ। प्रहरीका अनुसार शाही शुक्रबार बिहान ८:२० बजे सुर्खेत बसपार्कबाट लगामतर्फ जानका लागि खगेन्द्र थापाले चलाएको क.प्र.०२०० ख.०१९५ नम्बरको मिनीबसमा सवार भएका थिए ।

साँझ करिब ४:३० बजे चौकुने गाउँपालिका ३ बेतानस्थित राजु रामजालीको होटलमा पुगेका उनी राति करिब ८:३५ बजे एक्कासी बिरामी भई बेहोस भएका थिए । घटनाबारे जानकारी प्राप्त हुनासाथ अस्थायी प्रहरी पोस्ट लगामबाट प्रहरी सहायक निरीक्षक ज्योति सिंहको कमाण्डमा दुई जनाको टोली घटनास्थल पुगेको थियो । थप अनुसन्धानका लागि इलाका प्रहरी कार्यालय बाबियाचौरबाट प्रहरी निरीक्षक भूपेन्द्र शाहीको कमाण्डमा SOCO सहित पाँच जनाको टोली पनि खटिएको प्रहरीले जनाएको छ।

प्रहरीले घटनास्थलको आवश्यक प्रक्रिया सम्पन्न गरी राति ११:४० बजे शव पोस्टमार्टमका लागि प्राथमिक स्वास्थ्य केन्द्र सालकोट पठाएको छ । मृतकका भाइ समेत साथमा रहेको प्रहरीले जनाएको छ। घटनाको कारण खुल्न बाँकी रहेको र थप अनुसन्धान जारी रहेको प्रहरीले जनाएको छ ।

शुक्रबार, आषाढ ०५, २०८३मा प्रकाशित गरिएको