ज्वाला अपडेट
सुर्खेत । जिल्ला प्रहरी कार्यालय सुर्खेतको हिरासतमा रहेका २१ वर्षीय साकिर बक्सको मृत्यु भएपछि घटनालाई लिएर निष्पक्ष र पारदर्शी छानबिनको माग तीव्र भएको छ।
वीरेन्द्रनगर–१०, पिपिरा निवासी बक्स चोरीको आशंकामा प्रहरी नियन्त्रणमा रहेका बेला मृत्यु भएको जनाइएको छ। घटनापछि मृतकका आफन्त तथा स्थानीयवासीहरूले मृत्युको कारणबारे गम्भीर प्रश्न उठाउँदै सत्यतथ्य सार्वजनिक गर्न सम्बन्धित निकायसँग माग गरेका छन्।
मृतकका आफन्तहरूको दाबीअनुसार बक्सको छाती, मुखभित्र, खुट्टा लगायत शरीरका विभिन्न भागमा चोटपटकका चिन्हहरू देखिएका थिए। उनीहरूले बक्समाथि लगाइएको चोरीको आरोपसँग सम्बन्धित कुनै सामान समेत बरामद नभएको दाबी गरेका छन्।
घटनापछि आफन्त, स्थानीयवासी तथा सरोकारवालाहरूले हिरासतमा रहेका व्यक्तिको मृत्यु कसरी र किन भयो भन्ने विषयमा स्वतन्त्र तथा निष्पक्ष अनुसन्धान हुनुपर्ने बताएका छन्। उनीहरूले दोषी देखिए कानुनी कारबाही तथा पीडित परिवारलाई न्याय सुनिश्चित गर्न माग गरेका छन्।
स्थानीयवासीहरूले छानबिन प्रक्रिया निष्पक्ष नभए चरणबद्ध आन्दोलनमा उत्रिने चेतावनी समेत दिएका छन्।
यता, घटनाबारे सम्बन्धित निकायको आधिकारिक धारणा हालसम्म सार्वजनिक भइसकेको छैन। मृत्युको वास्तविक कारण पोस्टमार्टम प्रतिवेदन तथा आधिकारिक अनुसन्धानपछि मात्र स्पष्ट हुने बताइएको छ।
चोटपटकसम्बन्धी विवरण मृतकका आफन्तहरूको दाबीमा आधारित रहेको छ। घटनाको आधिकारिक पुष्टि सम्बन्धित निकायको अनुसन्धान तथा पोस्टमार्टम प्रतिवेदनपछि मात्र हुने प्रहरीले जनाइएको छ।
शनिबार, जेठ ३०, २०८३मा प्रकाशित गरिएको
१.
२.
३.
४.
५.
६.
