ज्वाला अपडेट
कर्णाली
कर्णाली प्रदेशका आठ जिल्लामा राष्ट्रिय स्वतन्त्र पार्टी (रास्वपा) ले नयाँ जिल्ला नेतृत्व चयन गरेको छ। पार्टीको संगठनात्मक नीति तथा केन्द्रीय समितिको निर्णयअनुसार आइतबारदेखि सुरु भएका जिल्ला अधिवेशनअन्तर्गत अधिकांश जिल्लामा नेतृत्व चयन सम्पन्न भएको हो।
कर्णालीका नौ जिल्लामध्ये सुर्खेत, हुम्ला, जुम्ला, जाजरकोट, कालीकोट र सल्यानमा सर्वसम्मत नेतृत्व चयन गरिएको छ भने दैलेख र रुकुम पश्चिममा मतदानमार्फत नयाँ नेतृत्व निर्वाचित भएको छ। मुगुमा भने अधिवेशन प्रक्रिया जारी रहेको पार्टीले जनाएको छ।
सुर्खेतमा रमेशकुमार सापकोटा पुनः जिल्ला सभापतिमा सर्वसम्मत चयन भएका छन्। रास्वपाको प्रारम्भिक संगठन निर्माणदेखि नेतृत्व गर्दै आएका सापकोटा लगातार दोस्रो कार्यकालका लागि सभापति बनेका हुन्। उनी हाल प्रतिनिधिसभा सदस्यसमेत हुन्।
हुम्लामा लक्ष्मण ऐडीको नेतृत्वमा नौ सदस्यीय जिल्ला कार्यसमिति चयन भएको छ भने जुम्लामा मक्करबहादुर भण्डारी, जाजरकोटमा महेश सिंह, कालीकोटमा प्रेमबहादुर केसी र सल्यानमा प्रकाश नेपाली पुनः सभापतिमा चयन भएका छन्।
दैलेखमा भने सभापतिका लागि भएको प्रतिस्पर्धात्मक निर्वाचनमा बखतबहादुर भण्डारी ९२ मतसहित विजयी बने। उनले अन्य तीन प्रतिस्पर्धीलाई पछि पार्दै नेतृत्व हात पारेका हुन्। रुकुम पश्चिममा द्रोण खड्का ४२ मत प्राप्त गर्दै जिल्ला सभापतिमा निर्वाचित भए।
रास्वपाले कर्णालीमा संगठन विस्तार र सुदृढीकरणलाई प्राथमिकता दिँदै जिल्ला अधिवेशन सम्पन्न गरिरहेको जनाएको छ। डोल्पामा भने पार्टीको राष्ट्रिय महाधिवेशनपछि मात्र जिल्ला अधिवेशन आयोजना गरिने बताइएको छ।
मंगलबार, जेठ २६, २०८३मा प्रकाशित गरिएको
१.
२.
३.
४.
६.
