सुर्खेत । वीरेन्द्रनगर नगरपालिका ४ स्थित श्री भैरव सामुदायिक वन तथा सहिद पार्क नजिकको जंगलमा एक युवक र एक युवती झुण्डिएको अवस्थामा मृत फेला परेका छन् । स्थानीयका अनुसार अन्दाजी २०/२१ वर्ष उमेरका युवक र १९÷२० वर्ष उमेरकी युवती ज्यामुनाको रूखको एउटै हाँगोमा सलको पासो लगाई झुण्डिएको अवस्थामा भेटिएका हुन् । घटनाबारे जानकारी पाएपछि स्थानीयले तत्काल प्रहरीलाई खबर गरेका थिए ।

बुधबार बिहान जंगलमा शव देखेपछि प्रहरीलाई सूचना दिइएको र खबर प्राप्त हुनासाथ घटनास्थलमा प्रहरी टोली खटिएको जिल्ला प्रहरी कार्यालय सुर्खेतले जनाएको छ । जिल्ला प्रहरी कार्यालय सुर्खेतका प्रहरी नायब उपरीक्षक (डिएसपी) मोहनजंग बुढथापाका अनुसार घटनासम्बन्धी विस्तृत विवरण केही समयपछि सार्वजनिक गरिनेछ । हाल घटनाको अनुसन्धान भइरहेको प्रहरीले जनाएको छ ।

बुधबार, पौष १६, २०८२मा प्रकाशित गरिएको