ज्वाला अपडेट
सुर्खेत । सुर्खेत जिल्ला वीरेन्द्रनगर नगरपालिका ३ माझगाउँ बस्तीमा पानीले हाहाकार भएको छ । स्थानीयको घरमा इनार छ तर पानी छैन । रित्तो गाग्री, जर्किन, जार, बोतल र जग समातेर पानीका लागि घण्टौँ लाइनमा बस्नु पर्ने बाध्यता रहेको छ ।
पानीको हाहाकार भइरहेका बेला वीरेन्द्रनगर नगरपालिका ३, माझगाउँस्थित विश्वासी मण्डली नामक चर्चले बोरिङ गरेर पानी वितरण गरेपछि स्थानीयले राहत पाएका छन् । माझगाउँ टोल विकास समितिले भने बोरिङबाट पानी निकाल्न एक सय दुई मिटर खन्दासमेत पानी भेटिएन ।
मण्डलीले ४० मिटर गहिराइबाटै पानी निकालेको छ । पानीको हाहाकारका बेला चर्चले ठूलो राहत प्रदान गरेको सोही टोलकी स्थानीय भगवतीकुमारी थापाले बताइन् ।
उनका अनुसार चर्चमा पानी लिन बिहान ४ देखि राति १२ बजेसम्म स्थानीय लाममा बस्छन् । लाममा बस्नेले दुईदेखि तीन घण्टा कुर्नुपर्छ । स्थानीय धनबहादुर खत्रीले भान्सादेखि शौचालयसम्म बोरिङ्कै पानीले धानेको बताइन् ।
कालिकोट शुभकालिका गाउँपालिका दुई भर्ता घर भई हाल उक्त टोलमा बस्दै आएकी रुपा विश्वकर्माले सहरको कहर बल्ल थाहा पाएको बताइन् । माझगाउँ टोल विकास समितिका अध्यक्ष तिलाचन्द्र अधिकारीले पानी, जिन्दगानी हो, प्रदेश राजधानीको नगरपालिका भन्ने मात्र छ, खानेपानी, विद्युत, सडकको समस्या दुर्गम भन्दा कम छैन भन्दै सुक्खायाममा बालबच्चालाई पानी खुवाउन र वर्षामा आवतजावत गर्नसमेत समस्या रहेको बताउंदै खानेपानी समस्या समाधान गर्न सरकारले नसकेको बताईन् ।
ती समस्याका विषय वडा हुँदै नगरपालिकासम्म राखे पनि कुनै सुनुवाई नभएको स्थानियको गुनासो गरे ।
बिहिबार, आषाढ १४, २०८१मा प्रकाशित गरिएको
१.
२.
३.
४.
५.
६.
