ज्वाला अपडेट
सुर्खेत । नेकपा एमाले जिल्ला कमिटी दैलेखको अध्यक्षमा सूर्यबहादुर शाही सर्वसम्मत चयन भएका छन् । नारायण नगरपालिका दैलेखमा जारी आठौँ जिल्ला अधिवेशनबाट शाही सर्वसम्मत अध्यक्ष चयन भएका हुन् ।
उपाध्यक्षमा प्रेमबहादुर बुढा पनि सर्वसम्मत निर्वाचन भएका छन्। अध्यक्ष पदमा चार जनाले उम्मेदवारी दिएका थिए । जसमध्ये तिलकप्रसाद रिजाल, नन्दकिशोर बस्नेत र प्रेमबहादुर बुढाले शाहीलाई समर्थन गर्दै उम्मेदवारी फिर्ता लिएपछि सर्वसम्मत नयाँ नेतृत्व चयन गरिएको छ ।
अध्यक्षमा सर्वसम्मत चयन भएका शाही यसअघि सातौँ जिल्ला अधिवेशनमा अध्यक्ष पदमा पराजित भएका थिए । जिल्ला विकास समितिको उपसभापति हुँदै यसअघि भूमि समस्या समाधान आयोग दैलेखको अध्यक्ष भइसकेका शाहीसँग राजनीतिको लामो अनुभव छ ।
यस्तै, अध्यक्षमा उम्मेदवारी दिएका हालका कार्यबाहक अध्यक्ष तथा पार्टी उपाध्यक्ष प्रेमबहादुर बुढा उपाध्यक्षमै दोहोरिएका छन् । उपाध्यक्ष बुढा २०७४ को स्थानीय तह निर्वाचनमा भैरवी गाउँपालिकाको अध्यक्ष भइसकेका नेता हुन् । दैलेखको कमिटीको सचिवमा हिमालयजंग शाह, उप–सचिवमा तारा कुमारी सोनी र भीमबहादुर बुढाक्षेत्री सर्वसम्मत चयन भएका छन् ।
मंगलबार, फाल्गुण ०१, २०८०मा प्रकाशित गरिएको
१.
२.
३.
४.
५.
६.
