सुर्खेत कारागारमा एक १९ वर्षीया युवती मृत फेला परेकी छन् ।
बिहीबार राति करिब १२ बजे दैलेखको गुराँस गाउँपालिका ४ घर भई सुर्खेत कारागारको ५ नम्बर कोठामा रहेकी संगीता शाही मृत फेला परेकी हुन् ।
जिल्ला प्रहरी कार्यालय सुर्खेतका सूचना अधिकारी एवं प्रहरी नायब उपरीक्षक (डीएसपी) कविन्द्र सिंह बोहराले शाही कारागारभित्रको शौचालयमा तन्नाको पासो लगाएको अवस्थामा मृत फेला परेकाे जानकारी दिए ।
घटनाबारे जानकारी दिँदै डीएसपी बोहराले मृतकका आफन्त आउने क्रम रहेको र घटनाको थप अनुसन्धान भइरहेको बताए ।
शाही गत असोजमा वीरेन्द्रनगर नगरपालिका ९ का २५ वर्षीय विशाल रावलको मृत्यु प्रकरणमा पक्राउ परेकी थिइन् । उनीमाथि कर्तव्य ज्यान मुद्दा चलिरहेको थियो ।
घटनाको वास्तविक कारण र परिस्थितिबारे प्रहरीले थप अनुसन्धान गरिरहेको जनाएको छ ।
शुक्रबार, मंसिर ०५, २०८३मा प्रकाशित गरिएको



