नेपाल पत्रकार महासंघले नेपाल कर्म अनलाइनका सम्पादक तथा पत्रकार महासंघ सुर्खेत शाखाका उपाध्यक्ष सुशीलकुमार खड्काको चरित्रमा आघात पुग्ने गरी सामाजिक सञ्जाल र केही अनलाइन सञ्चारमाध्यममार्फत अनर्गल सामग्री सम्प्रेषण गरिएको घटनाप्रति गम्भीर ध्यानाकर्षण भएको जनाएको छ।

महासंघका महासचिव रामप्रसाद दाहालद्वारा जारी विज्ञप्तिअनुसार साउन १३ गते जिल्ला प्रहरी कार्यालय सुर्खेतले पक्राउ गरी अनुसन्धान अघि बढाएको एक व्यक्तिसम्बन्धी समाचारलाई लिएर पत्रकार खड्कालाई लक्षित गर्दै असन्तुलित तथा उत्तेजनापूर्ण सामग्रीहरू प्रसारण गरिएको उल्लेख गरिएको छ।

विज्ञप्तिमा अनुसन्धानकै क्रममा रहेको विषयमा पत्रकार खड्काको धारणा नलिई एकपक्षीय सामग्री प्रसारण गरिएको तथा प्रहरीले समेत अन्तर्वार्ता दिएर अभियुक्तलाई सहज रूपमा सार्वजनिक हुने वातावरण बनाएको आरोप लगाइएको छ।महासंघले शान्ति सुरक्षाको जिम्मेवारी वहन गर्ने निकायबाटै यस्तो गतिविधि हुनु निन्दनीय र खेदजनक रहेको जनाएको छ।

साथै, घटनाको निष्पक्ष छानबिन गरी दोषीलाई कानुनी दायरामा ल्याउन तथा भविष्यमा यस्ता घटना दोहोरिन नदिन सम्बन्धित निकायसँग माग गरेको छ। महासंघले सञ्चारमाध्यम र पत्रकारलाई पत्रकारिता आचारसंहिताप्रति जिम्मेवार रहँदै सत्य, तथ्य र सन्तुलित समाचार सम्प्रेषण गर्न पुनः आग्रह गरेको छ।

आइतबार, साउन १७, २०८३मा प्रकाशित गरिएको