सुर्खेत । आफूलाई पाथिभरा माता भनेर चिनाउने सुर्खेतका वीरेन्द्रनगर नगरपालिका–३ का २४ वर्षीय समीर थापालाई जिल्ला अदालत सुर्खेतले पुर्पक्षका लागि थुनामा पठाउने आदेश दिएको छ ।

न्यायाधीश तीर्थराज भट्टको एकल इजलासले थापालाई कारागार चलान गर्न र घटनाको भिडियो खिच्ने अर्का व्यक्तिलाई ५० हजार रुपैयाँ धरौटीमा छाड्न आदेश दिएको अदालतका सूचना अधिकारी उज्ज्वलदेव रावलले जानकारी दिए ।

झारफुक तथा हेराई–मनाई गर्ने बहानामा महिलामाथि अमानवीय दुर्व्यवहार तथा कुटपिट गरेको भिडियो सामाजिक सञ्जालमा सार्वजनिक भएपछि प्रहरीले थापालाई साउन १३ गते वीरेन्द्रनगर–३, एरिचोकबाट पक्राउ गरेको थियो ।

थापासहित भिडियो खिच्ने व्यक्तिविरुद्ध बोक्सी आरोपसम्बन्धी कसुरमा साउन ८ गते जिल्ला अदालत सुर्खेतमा मुद्दा दर्ता गरिएको थियो । थुनछेक बहसपछि अदालतले मुख्य अभियुक्त थापालाई पुर्पक्षका लागि थुनामा राख्न र भिडियो खिच्ने व्यक्तिलाई धरौटीमा रिहा गर्न आदेश दिएको हो ।

नेपालको मुलुकी अपराध संहिता, २०७४ ले धामी झाँक्री वा झारफुकको नाममा कसैमाथि अमानवीय, अपमानजनक वा हिंसात्मक व्यवहार गर्न निषेध गरेको छ । संहिताको दफा १६८ अनुसार झाँक्री वा झारफुकको बहानामा कसैलाई अमानवीय वा अपमानजनक व्यवहार गरेमा पाँच वर्षसम्म कैद र ५० हजार रुपैयाँसम्म जरिवाना हुन सक्ने व्यवस्था छ ।

साथै, पीडितलाई कसुरदारबाट मनासिब क्षतिपूर्ति भराउन सकिने कानुनी प्रावधानसमेत छ। त्यस्तै, झारफुकका नाममा हातपात, गालीगलौज वा अभद्र व्यवहार गरेको पुष्टि भएमा कुटपिट तथा सार्वजनिक शान्तिविरुद्धको कसुरसम्बन्धी थप कानुनी कारबाही हुन सक्ने व्यवस्था छ।

मंगलबार, भाद्र ०९, २०८३मा प्रकाशित गरिएको