ज्वाला अपडेट
काठमाडौँ । नेकपा एमालेको ११ औँ महाधिवेशन नजिकिँदै जाँदा अध्यक्ष केपी शर्मा ओलीलाई चुनौती दिन पूर्वराष्ट्रपति विद्या भण्डारी र वरिष्ठ उपाध्यक्ष ईश्वर पोखरेल नेतृत्वको समूहले पूर्ण प्यानल उठाउने तयारी गरेको छ ।
यस समूहले पोखरेललाई अध्यक्ष पदका लागि अघि सार्ने भए पनि वास्तविक प्रतिस्पर्धा भण्डारी र ओलीबीच हुने एमालेभित्र चर्चा बढेको छ ।
भण्डारीले नवीकरण भइसकेको सदस्यता रोकिदिएपछि ओलीप्रति असन्तुष्टि गहिरिएको बताइन्छ । ओलीले तेस्रो कार्यकालका लागि अध्यक्षमा उत्रने तयारी गरे पनि महाधिवेशनमा नै नेतृत्व चयन गर्ने उनको मनसायले विद्या–ईश्वर पक्ष झन् सक्रिय भएको स्रोतहरू बताउँछन् ।
नेताहरूका अनुसार, पोखरेलको उम्मेदवारी भण्डारीकै राजनीतिक पहल र असन्तुष्टिको प्रतिफल हो । मदन भण्डारीले अघि सारेको विचारबाट ओली विचलित भएको आरोप लगाउँदै भण्डारी पुनः राजनीतिमा सक्रिय हुन चाहेकै बेला उनको सदस्यता रोकिएको थियो, जसले दुवैबीच दरार बढायो ।
यस समूहले महाधिवेशनमा ओलीलाई सर्वसम्मत अध्यक्ष बन्न नदिन ‘सशक्त र बलियो टिम’ उठाउने तयारी गरेको छ । सचिवालयभित्रका धेरै नेता पोखरेलको पक्षमा खुलेका छन्, जसमा युवराज ज्ञवाली, अष्टलक्ष्मी शाक्य, सुरेन्द्र पाण्डे, योगेश भट्टराई र गोकर्ण विष्टलाई जोडिन्छ ।
महाधिवेशनमा नीति, विधि तथा जेन–जी आन्दोलनपछि देखिएको राजनीतिक अवस्थाको समीक्षा आवश्यक रहेको नेताहरू बताउँछन् । देशभरबाट चुनिएर आएका २१०० भन्दा बढी प्रतिनिधिद्वारा नेतृत्व चयन हुने भएकाले प्रतिस्पर्धा निकै रोचक हुने उपाध्यक्ष ज्ञवालीको भनाइ छ ।
विद्या–ईश्वर समूहले केही दिनमै प्यानल घोषणा गर्ने तयारी गरेको जानकारी दिँदै नेताहरूले प्रतिनिधिलाई विवेकपूर्ण निर्णय गर्न आग्रह गर्ने बताएका छन् ।
मंगलबार, मंसिर ०३, २०८२मा प्रकाशित गरिएको
१.
२.
३.
४.
५.
६.
