कालीकोट । जिल्ला सदरमुकामसमेत रहेको मान्म बजारको खाँडाचक्र नगरपालिकाको नयाँ भवन निर्माणका लागि जग खन्दा पहिरो गएपछि सडक अवरोध भएको छ । कर्णाली राजमार्गको छेउमा भवन निर्माणका लागि निर्माण व्यवसायीले जग खन्दै जाँदा पहिरो गएपछि सडक अवरुद्ध भएको हो ।

भवन निर्माणका लागि जग खन्दै गरेका दुई वटा एक्साभेटरको कम्पनले गर्दा सदरमुकाम बजार प्रवेश गर्ने मूल सडक भासिएको र आउतजाउत समेत बन्द भएको छ । भवन निर्माणको जिम्मा लिएको आरएनसिएस बिल्डर्सले पहिरो रोक्न लगाउनुपर्ने पर्खालका लागि सम्झौतामा उल्लेख नभएकाले आफूहरूले जे जति भत्के पनि पर्खाल लगाउन नसक्ने अडान लिएपछि मान्म बजार प्रवेश गर्न कठिन भएको छ । एक हप्ताअघि खसेको पहिरोले सडक पूर्ण रूपमा बन्द हुँदा सहज बनाउनतर्फ कसैले चासो दिएका छैनन् । अति आवश्यक सवारीसाधन एम्बुलेन्स पनि ठप्प छ ।

धर्ती फाउन्डेसनले बिरामीको सहजताका लागि सञ्चालन गरेको एम्बुलेन्स बजारमै थुनिएको छ । निर्माण कम्पनी आरएनसिएस बिल्डर्सका प्रतिनिधि अलिबहादुर शाहीले भवन निर्माणको लागत प्रतिवेदनमा पर्खाल लगाउने उल्लेख नभएको बताए । पर्खाल लगाए मात्र बजारको सडक खुलाउन सकिने अवस्था छ ।

मंगलबार, चैत्र ०४, २०८१मा प्रकाशित गरिएको